保險界要人，有資格做Sir級嘅C先生在阿松辭職前夕，在飯局中與左丁山碰頭，講起七一大遊行，原來C先生雖然資格夠老，子女成材，佢仍然有火氣，喺七月一日照樣上街。佢知道一定入唔到維園，於是駛車到黃泥涌道，入馬會停車場，預備泊低架車就行去天樂里口嘅軒尼詩道插隊。點知人同此心，心同此理，停車場塞滿車，好辛苦至搵到一個車位，佢話：「入邊當然好多Benz，啲馬會會員好多身穿黑T恤，一家大細，拖男帶女，由老至嫩，一齊行去天樂里參加遊行，咁多馬會會員反廿三條，反董，未曾見過！」
問C先生：「你咁熱心遊行，有冇叫陳智思（保險界別立法會議員）投反對票？」C先生話：「陳議員梗係知道我哋嘅意思啦！不過佢一早話會棄權，因為咁啱佢要去美國休斯頓檢查心臟喎！其實佢亦有苦處，因為中聯辦、董班子一直向陳家施壓力，要陳議員投贊成票。老實講，如果陳議員投廿三條贊成票，明年我哋一定唔畀選票佢，我哋好多保險界同行上街啫。」功能組別議員就有呢啲難處。所以劉炳章、李家祥等一直吞吞吐吐，唔敢講得清楚也。只是國安法雖然押後，下一個立法年度一定上立法會，獨立議員仍然會好難做。講完七一，大家又講到出身金融界嘅松哥，C先生話照睇相佬講，阿松唔多掂，皆因個面相太削也，點解咁講，明天再續。