睇嚟Juno老竇被查事件，對本地股壇冇帶來太大影響。雖然噚日中建電訊（138）一系3隻股票都停牌，但其他炒股則如常炒作，十分熱鬧。
好似先前大股東減持嘅華豐環保紡織（364），急升後只係調整咗3日，噚日又再度急升，大升14%，收1.22元，再創上市以來新高。
經紀陳話，華豐個勢咁靚，如果唔順勢搞批股，就認真對自己唔住。收市冇耐，果然聽到華豐先舊後新配股，唔知隻股今日表現如何？
經紀陳又話，上市唔夠1個月嘅海域化工（2882），將於本周四公布全年業績，由於招股書一早講明，估計全年賺6300萬元，兼有4仙股息派，所以夠晒藉口炒高，可睇高一線。
經紀陳解釋，其實睇好海化嘅原因，主要係因為有份幫海化上市嘅證券行，一直都大力支持海域（1220）。海化上市之初，利用穩定價格安排，買入1783萬股。海化上市發售唔夠1.2億股，既然人哋都坐咗咁多貨，所以唔怕跟。
慕容小初