美洲金盃隨住墨西哥狂數牙買加五球之後，準決賽四支球隊終於產生，難得嘅係四場半準決賽都開上盤，非常正路。
早前美洲金盃分組賽賽事都有幾多爆冷戰果，好似巴西第一場輸畀墨西哥，第二場對洪都拉斯就贏波輸盤，加拿大又輸畀古巴。不過我求大俠開賽前話過呢個賽事會幾正路，結果半準決賽全部開上盤。墨西哥上盤係咁落飛，咁正路嘅賽果，唔少波友都有「斬獲」。
美洲金盃四強就會喺香港時間周四早上開波，東道主美國會對巴西，墨西哥硬拼哥斯達黎加，我求大俠睇往績，美國同墨西哥喺呢項賽事一向有佳績；到時究竟揀邊隊？留意蘋果波經啦！
重記唔記得哥倫比亞九號前鋒艾斯迪薩巴？無錯，就係上月洲際國家盃時射親門都中柱中楣嗰位，佢喺周日巴西全國聯賽代表高士路上陣時，獨建兩功，其中一球更加係「倒掛金鈎」，球隊最終亦五比一大勝柏拉拿。艾斯迪薩巴喺今次賽事入咗九球，一洗早前「柱男」霉運！
巴西老將羅馬里奧近一年可謂非常失意，離開巴西到卡塔爾發展完全失敗；但最近終於有好消息，就係前球會華斯高終於答應畀番過去十五年，近六百六十萬美金嘅欠薪過佢，原因係華斯高從保加利亞球會索菲亞陸軍收到嘅錢，羅馬里奧總算有多筆錢過下半世。
今夏由阿積士轉會去羅馬嘅捷古，日前就首次代表球會喺奧地利友賽漢諾威時上陣，唔知係為咗爭取表現，上半場四十一分鐘就因粗野攔截攞紅牌出場。我求大俠講笑咁諗，羅馬上季已經係意甲攞紅牌最多嘅「茅王」，捷古唔通咁快就適應咗隊波嘅特性？
多蒙特𠵱家有伊雲尼遜同芬寧斯要唞半年，外界認為佢哋會斟返啲卡士球員，點知佢哋經理梳錫話熱刺棄將科特係目標之一。科特冇錯經驗好豐富，但成三十三歲，加上呢兩年喺熱刺上陣唔多，狀態有幾好應心照。如多蒙特真係簽佢，我求大俠只好祝佢哋好運。