福山雅治雖然已經三十四歲，但佢依然保持青春活力，好多少女同師奶都會俾福山電暈，就算我大口羅拉對異性有好高要求，睇見福山一樣中招。以往搵開靚女拍廣告嘅寶礦力，呢排轉咗福山做代言人，即刻冧死我哋呢班fans。
早排福山雅治特登去夏威夷，拍攝佢第三個寶礦力廣告，攝製隊當然唔係求其叫佢喺海灘上面擺幾個甫士就叫做拍廣告啦，聽講今次廣告係以「藍色」、「青春」同「集合」做主題。
先講「藍色」，除咗海水之外，出現喺鏡頭入面嘅物件都以藍色為主調，當中包括福山着住嘅夏老威以及佢揸住嘅電結他，連大班臨記嘅服裝都要有清涼嘅藍色感覺！
至於「青春」方面，當然唔少得一班後生仔女做人肉布景板啦，而「青春」亦冇局限年齡，唔同年紀嘅人都可以具有青春活力。至於為咗配合「集合」嘅主題，廣告入面出動咗二百五十個臨記，有唔少重係夏威夷居住嘅日本少女，佢哋好慶幸能夠同日本巨星一齊拍廣告，所以着住比堅尼演出時，顯得份外投入同興奮。