𠵱家戴泳鏡游水，再唔會好似以前咁，只是為咗保護眼睛咁簡單，一副防水防霧防UV嘅泳鏡固然唔少得；如果你係游泳好手，或者係Wakeboard、浮潛水上活動愛好者，就更加要有一副夠Pro夠型嘅泳鏡傍住出海。至於小朋友們，就梗係要玩味十足嘅蝙蝠俠泳鏡套裝，隨時變身水中蝙蝠俠玩個飽。既然「玩」水方式各有不同，就要睇清楚邊款泳鏡先合你心水喇。
記者：馬慶武
攝影：黃子偉
Model：Olivia（SunSpot）
水上運動專用嘅泳鏡，鏡面面積會較大，而因為呢類運動唔係喺水底進行，所以採用較闊大嘅鏡片亦不用擔心增加水中阻力，玩滑水等活動，高速滑行時亦更有效阻擋強風。
View嘅全鏡框以透明膠製造，擁有傳統泳鏡外形但使用較闊大鏡片，喺流線及視野兩者間取得平衡，即係唔太阻水之餘視野亦更闊。
Dolfino設計同樣配合玩各項水上運動，而且流線型鏡片弧度大，視野亦非常遼闊。
Speedo嘅水上運動專用泳鏡鏡框以較軟較有彈性嘅物料製成，貼面效果更佳更舒適。而鏡片質地亦較一般鏡片有彈性，能承受更大扭曲力。
身為游泳好手，當然要揀番副專業泳鏡啦。呢類泳鏡講求流線型，將水中阻力實行減到最低，令你可以將個人水準發揮得淋漓盡致。
而呢副Speedo長方形鏡框及鏡片，外形突出，特別之處係採用onepiece軟鏡框，戴得更穩陣更舒服。
呢副Speedo泳鏡較細較流線型，鏡帶亦較幼，將水中阻力減到最低，咁游泳嘅速度就更快啦。而呢副賽鏡嘅鏡片更係採用鏡面反光，防UV能力更強。
比賽當中，戴住呢副Arena泳鏡，不但讓你看清眼前景物，而且其鏡片側面亦係透明，咁你比賽時就可以看清對手嘅一舉一動啦。
浮潛喺香港愈來愈流行，想玩埋一份首先就要買番一套簡單裝備喇。浮潛泳鏡特點係透明鏡片面積大，將視野影響減到最低，而其鼻罩，可避免用呼吸管呼吸時鼻子入水。
呢副AquaPro浮潛鏡採用含聚碳酸酯嘅鏡面，堅硬又唔易刮花，耐用安全。
呢套浮潛泳鏡套裝除泳鏡外，重包括浮潛必備嘅水底呼吸管，而且更係運動服名牌BodyGlove出品。
如果你唔係咩游泳健將，去游水只係想舒展吓筋骨，同屋企人一起享受一個清涼夏日，以下呢幾款泳鏡就最啱我哋呢啲「平民百姓」。
左右鏡框均以上下兩條膠帶固定，鏡框位置可作左右調校，無論咩面形都一樣咁啱戴。
有HelloKitty、Melody、LittleTwinStars等不同款式；套裝包括有泳鏡、毛巾及透明袋仔，最重要當然係全部物品都印上卡通人物嘅可愛圖案啦。
呢個泳鏡套裝包括一個Batman面具連泳鏡，及手腳佩戴嘅手套蛙鞋。小朋友可以全套上身變身水中蝙蝠俠，不過先決條件係要唔怕俾人笑。
（$79.9/C）
戴咗呢副泳鏡潛半個頭落水底，就可以凸出頭頂嘅鯊魚鰭扮鯊魚，都係搞笑多過驚嚇。
A:Sogo（銅鑼灣軒尼詩道555號/28338338）
B:city'super（銅鑼灣時代廣場地庫/25062888)
C:玩具反斗城（銅鑼灣皇室大廈3樓/29916222)
D:SanrioGiftGate（樂富吉之島一樓/23392278)