李克勤與環球唱片的合約將於年底屆滿，其經理人張國忠正與環球香港區總裁陳少寶及東南亞區總裁許智偉傾談續約事宜，克勤前晚笑言會趁陳少寶現正涉及樂壇貪污案期間坐地起價，他又多番揶揄陳少寶被廉署邀請去飲咖啡。
李克勤前晚到灣仔會展為「陳慧琳FreeYourMind音樂會」任表演嘉賓，他接受訪問時透露與環球的歌手合約將於年底屆滿，故現正斟洽續約。近日環球香港區總裁陳少寶涉及樂壇貪污案而被廉署拘捕，克勤不諱言會趁此時坐地起價，言語間屢次提到陳少寶到廉署飲咖啡。
克勤坦言現時有幾家唱片公司向他招手，但他會優先考慮環球，他說：「喺環球坐得咁安樂，唔想郁呀，我睇陳生（陳少寶）有冇誠意啦，最近佢都好頭痕，我重唔趁呢個時候起價咩？佢重飲緊咖啡。」
問到陳少寶事件會否對其續約有影響，克勤說：「我都唔急，重有幾個月，除非公司對我差啦。其實話加價都係講笑，錢就間間都差唔多，最重要係出國語碟，環球出唔到就拜拜，我係時候進軍外地市場。如果出唔到就對唔住，你繼續飲咖啡啦。」
克勤會否等樂壇貪污案明朗化再談續約？他說：「都唔知佢（陳少寶）飲咖啡要飲幾耐，𠵱家許智偉（環球東南亞區總裁）同張國忠（克勤經理人）傾緊，陳少寶都有一齊傾嘅，佢重要返工㗎，唔係淨係飲咖啡。」克勤謂早幾日陳少寶原本要與他傾談與國際巨星合作事宜，現延至下周再傾。
日前有傳許志安為怕正東招攬克勤，故自壓身價續約，克勤說：「我同安仔係老友又係競爭對手，大家都係長途馬，如果安仔攞獎我都替佢開心，我唔信佢自壓身價，歌手加入唱片公司只會壯大間公司。」問到是否一山不能藏二虎？克勤說：「阿倫同哥哥（張國榮）都係咁啦，我見到佢唔會唔打招呼，雖然我冇佢個女人咁重要。」
採訪：王連連
攝影：仇志德
