美股上周五大升，港股噚日卻先升後跌，唔知係咪投資者對中央挺董感到不滿？不過，阿虎覺得中央唔似阿董同香港市民對立，而且對香港事務未作出表面化干預，都算係咁咯。恒指收報10102，跌37點，成交減少至82.27億元。
黑客話，港股偏軟主要是因為電訊股再有換馬行動，但今次唔關電盈（008）事，而係同中電信（728）有關，中電信就快有注資行動，但就未必會透過發行新股進行，故有歐資沽售其他電訊股，換馬追捧中電信。
和黃（013）則再受歐洲3G合營訴訟影響，股價被質低近2%。先前KPN已經唔肯承擔英國3G財務而與和黃打官司，今次又輪到意大利3G合營夥伴搞搞震，真係搞到和黃周身痕。中電信則創新高，收報2.20元，升3.5%。
華豐（364）稍作震倉後，噚日再度發威，大升14%，升破1.20元關口，收報1.22元，成交高達1.337億元。
Cookie話，如果呢個時候VP沽貨就真係賺到笑。VP之前買入3880萬股華豐，每股0.633元，帳面已賺2277萬元。不過e莉莎話，VP唔會咁快就散貨，不過公司就趁高批股。
嘉里建設（683）今日開股東會表決私有化建議，如無意外會停牌，私有化作價為每股9.50元，噚日嘉里收8.35元，睇嚟私有化計劃都係失敗居多。
阿虎