教育統籌局局長李國章棄教鞭從政，原來第一個反對嘅人，就係佢嗰兩位公子。最新一期嘅《公務員通訊》，訪問咗兩位局長，李國章係其中一位。
據李局長講，當初佢放棄中大校長一職，太太一直好支持，又話佢係「唐吉訶德」，明知不可為而為。點知兩個仔仔就猛咁反對，又話對佢呢個決定好失望，又「教訓」同「威脅」佢話：如果接受任命，第一個鬧佢嘅人，就係兩個仔。李局長最後都接咗呢份工，唔知兩個仔𠵱家重有冇鬧佢？
做得局長，就要識得平衡各方勢力。另一位受訪嘅環境運輸及工務局局長廖秀冬，佢最近話眼見葉劉淑儀同梁錦松落台，睇到政治嘅殘酷。廖秀冬喺《公務員通訊》訪問中，又引述一位著名教授嘅說話，指運輸交通只需要用三個詞語去形容，就係「政治、政治、政治」，「沒有誰對誰錯，一切都是政治」。睇嚟，廖秀冬入咗官場至今，對「政治」呢兩個字愈來愈感受良多。
傳真︰2623-9278
電郵︰