自由黨主席田北俊無端端做咗人民英雄，佢自己都始料不及。不過，八方最近同佢傾開，佢仍然好high咁話，今次得到市民對自由黨另眼相看，覺得佢哋唔係直選都代表到市民心聲，十分多謝咁話。至於工商界，就更加唔使講，所有人都讚佢哋做得啱，唔怪得田少自己讚自己話：「呢啲先至叫做leadership（領袖能力），唔通每次都要問吓人先做？」睇怕老董都要學吓嘢。
據田少形容，由7.1起個幾日簡直係「十國咁亂，打到埋身，拆炸彈緊要，重邊度得閒諮詢。」田少話七月二日早上十點阿董見佢同曾鈺成，當時阿曾公開建議為23條剝兩隻牙，即係唔要從屬組織以及加入公眾利益為抗辯理由，當時佢認為五十萬人上街咁大件事，好多嘢都未搞清楚，有啲係負資產，有啲倒董，唔係人人都反23，「佢哋可能唔係牙痛、係頭痛呢，同人剝牙一樣俾人鬧！我認為應該先斷症，然後對症下藥。」點知阿董一於唔理咁多，係要撼頭埋牆。
田少誓神劈願話自己上京見廖暉之前同返香港開記者會要求押後二讀之後，都唔知老董決定剝三隻牙咁多，一切都係星期六早上緊急會議先知道。
佢當時同記者講，話要睇吓民意是否接受，二十四小時後見冇起色，田少同黨員周梁淑怡、劉健儀佢哋就決定堅守立場，寧願畀老董、行會同事，同埋一班唔敢得罪老闆嘅問責高官以及廖暉鬧，田少都係我行我素，拒絕亂咁剝牙。
傳真︰2623-9278
電郵︰