陳奕迅（Eason）與古天樂昨日在灣仔馬師道一書報攤拍攝電影《豪情》，昨日劇情講述Eason及古仔各自出了一本色情刊物，Eason那本叫《春情》，而古仔的則名為《激情》，由於兩本書十分暢銷，所以古仔與Eason要與阿伯爭奪最後一本，場面搞笑。
身為《豪》片監製的古仔，提到會否再接再厲監製新片時說：「拍咗幾個月，自己都暈暈哋，因為做監製要理好多瑣碎事，不過好彩我哋申請拍街景都好順利。」
而Eason近日正忙於拍攝《豪》片及《衝鋒陷陣》，在《衝》片中Eason與郭富城合作，早年Eason曾經揚言四大天王中他只會買張學友的唱片，問到今次與城城合作時會否感到尷尬？Eason即時露出尷尬的神色，不過他死撐說：「唔尷尬，我哋合作嗰陣原來佢好好笑㗎，因為佢同我一樣咁儍嘛。」而Eason將今日會推出新碟。
而郭富城昨日被問到與Eason合作是否愉快時則說：「愉快，雖然我外表好似好cool咁，其實我好隨和，我同佢點會有芥蒂，自己真係唔mind，因為我器量好大。」至於是否代表已經原諒了Eason時，城城則說：「又唔係咁講，我份人冇乜所謂。」那麼他與Eason是不是朋友？城城說：「唔係friend番，係我個人冇乜芥蒂，可能係外間嘅傳聞以為佢講嘅說話令到我有芥蒂啫，識我嘅朋友都知我唔係咁小器，而且我拍戲同唱歌經驗比佢好，所以我會盡量教佢。」
採訪：卓美娟、胡比
攝影：陳慧安