鬼佬L自倫敦放假返嚟，約飲咖啡。佢旅行期間，睇英文報紙，有好多新聞關於七一遊行、董生唔掂等等。返嚟坐低冇耐，又遇上葉劉淑儀、梁錦松辭職，一時消化不了，叫左丁山講解畀佢聽。
左丁山講完，鬼佬L若有所思咁話：「情勢實在轉得太快。不久前，梁錦松重好落力推銷佢嘅政策，亞厘畢道路邊社（大佬，上星期二誤植為路透社，唔好害我呀）消息話，阿安東尼為咗邀請蘭桂坊之父盛世文做海洋公園主席，親自與煲呔曾一齊拜訪盛老闆，要求佢勉為其難，為香港服務。盛老闆本來對公職毫無興趣，推咗幾次，但兩位司長親自上門，覺得唔好意思，惟有接受。你話兩司長為香港，求才若渴，幾難得呢！」海洋公園啲顧客唔係多數來自內地嘅咩？點解要搵洋人做主席？都係為咗國際形象，有啲國際商家參與咁解啫，以示香港唔係洋人口中嘅provincialcity吖嘛。
鬼佬L又問：「估唔到安東尼咁快鬆人，不如請個美國賓架做佢個位，以示香港國際化！」當然唔得啦，外籍人士唔可以做司長嘅，基本法有規定。但鬼佬L另外一個提議幾好，佢話：「聽講曾一哥唔係董先生嘅一杯茶（cupoftea），但董先生就欣賞許一哥，許一哥從不表態，退休後十分低調，警方老友話，由許一哥做保安局局長，一定可以服眾喎，至少所有紀律部隊都唔會反對先！」左丁山諗吓都覺得許一哥係好人選。