人大代表李鵬飛早前一句「董生已經玩完」，被《大公報》一個專欄不點名批評，噚日輪到老愛國人大代表吳康民出招，人大公開批評人大，呢場內訌好戲喺香港政壇都算罕見。
《大公報》噚日大字標題登咗段新聞，指吳人大斥飛哥危言聳聽。事緣飛哥早幾日話若非田少辭職迫到老董押後23條立法，7.9可能又有幾十萬人圍住立法會，隨時「血洗中環」，吳人大認為飛哥太過誇張，並透露本來打算喺上星期人大每月例會上當面質問飛哥，報道又引述全國人大常委曾憲梓稱，飛哥言論「應予以批評」。
雖然受到曾憲梓同吳康民嚴厲批評，但飛哥行走江湖多年，呢啲口誅筆伐對佢分毫無損，八方噚日搵佢聽聽佢有乜回應，電話傳來佢招牌式哈哈大笑，「佢（吳康民）講乜由得佢囉，我都費事回應。」原來當時佢正同牌友打緊橋牌，搏殺之際重點理得吳康民噏乜呢！
（圖）吳康民要求飛哥道歉。
傳真︰2623-9278
電郵︰