若要數電單車先驅，一定唔少得德國寶馬嗰份，皆因佢哋多項技術（如已沿用多年嘅水平對向引擎設計），幾乎成為佢哋嘅標誌，並廣受車迷歡迎；今年適逢寶馬電單車踏入80周年，香港代理特別將電單車部陳列室擴充營業，而且重引入最新嘅車款，真係值得各位電單車Fans去參觀吓㗎！
記者：李高 攝影：陳盛臣
查詢：寶馬香港（27145271）
如果你先前有到過寶馬電單車Showroom參觀的話，相信都會覺得內裏面積比較狹小，睇車時略嫌有點侷促；但經代理方面大灑金錢將之擴充後，不但面積較先前足足擴闊咗四倍，就連擺放車輛數目亦增至二十多部，另外重有專櫃展示各項鐵騎士專用配件㖭！比起以前更見「多姿多采」㗎！
寶馬電單車向來予人嘅印象，都係走成熟穩重路線；但近年廠方卻積極拓展年輕化市場，將旗下車款開始走上德國式潮流路線，其中首先走呢種路線嘅係F650CS，完全大玩StreetFunBike感覺；而今次抵港嘅R1150RRockster屬廠方旗下中堅嘅R車系，雖然機械結構並無太大改變，但外形及配色就變得更具時代感。
Rockster主要仍配用一台1130cc水平對向雙氣缸引擎，而6前速波箱、前Telelever後Paralever更屬指定動作；然而，最先搶去眾人視線嘅，當然分別係銀底橙及銀底綠嘅全新車身顏色配搭，可謂搶眼到爆。再到前面一睇，一對近年流行嘅「大細眼」頭燈，取代咗傳統圓燈組合，可謂完全追上潮流；而頭燈上嘅小風擋，筆者唔敢肯定實際效用有幾多，但絕能令車子造型更見吸引。除此之外，由於今年係寶馬電單車80周年，廠方特別為Rockster推出一部80周年紀念版；此車用上白色車身為主並配以黑色拉花，另外又加入ABS為標準裝備，就連後座乘客座位亦被取消而變成行李架。同時由於屬限量版關係，故此車主更會獲特別證書以資證明㖭！
引擎：1130cc空油冷四衝程水平對向雙汽缸
馬力：85ps/6750rpm；扭力：10.0kgm/5250rpm
尺碼：2170×1097×920mm；車重：219kg
新車售價：$103,125（8月2日前推廣優惠價）
相信不少鐵騎士響炎熱嘅夏天揸住部車，都會覺得又曬又熱，但始終都係「皮包鐵」，着得好啲對自己嘅保護都好啲；故此代理方面特別引入一批適合香港夏天穿着嘅保護衣物，特點係全套保護衣物採用特別通風設計，散熱面積特大，肯定唔會焗到生熱痱。