咪睇我大口羅拉平時講嘢咁粗鄙，其實我同好多講求生活品味嘅《蘋果》讀者一樣，收工嗰陣睇唔少世界經典名片，好似已故電影大師塔可夫斯基（AndreiTarkovsky）嘅不朽藝術巨作、七九年改編自StanislawLem科幻小說嘅《Solaris》，我羅拉都有儲齊唔同版本嘅DVD。
而上年奧斯卡得獎導演史提芬蘇德堡（StevenSoderbergh），就同《鐵達尼號》大導演占士金馬倫（JamesCameron）合作，重拍咗《Solaris》。套片雖然未喺本地上映，但我羅拉已經睇咗新鮮出爐嘅美版DVD。男主角佐治古尼（GeorgeClooney），喺戲入面同女拍檔NataschaMcElhone有親熱鏡頭，四十二歲仍然一身結實肌肉嘅佐治，喺床上露股食即食麵，又俾女主角摸籮柚，咁犧牲色相，唔怪得佢有咁多師奶fans。
不過，《Solaris》本身唔係為師奶服務嘅娛樂片，即使佢係科幻片，亦唔係玩死光槍同打怪獸嗰隻，套戲係集合懸疑、科幻同愛情，雖然新版拍得比舊版淺白，但稍欠舊版嘅詩意同哲理，難怪毀譽參半。