上周中甲A嗰場北京現代對陝西國力，臨場落飛「五級跳」嘅經典波盤重記憶猶新，唔知係咪球迷愈嚟愈多料收，前日幾場甲A波，又見上盤被狂捧！但係呢次就冇咁筍，莊家終於掠番鋪嘞！
周日嘅雲南紅塔及大連實德，兩隊臨場都俾人追捧到最後讓球半/兩球同兩球，尤其係雲南紅塔初盤都不過係讓半/一！但係今次呢兩個「內幕盤」就唔似上次咁順利得手，重係一齊揩嘢。最慘係嗰啲唔貪心，諗住博單Ｗ都算嘅球迷，事關大連嗰場重和埋㖭！
呢個故事話畀大家聽，唔好羊群心理，咪見人捧你又捧！最精明嘅就梗係信晒我哋班名家貼士啦，呢排都好堅，想搵定賭馬會波嘅本錢，就要跟買捧場嘞！
車仔領隊雲尼亞里話教咗波十五年，最開心𠵱家，因有阿巴莫域治呢條大水喉射住，可買心頭好。唔係我求大俠潑雲尼亞里冷水，車仔簽返嚟嘅格連莊臣同謝利美及𠵱家斟緊嘅布歷治都係阿巴莫域意思，雲尼亞里，你清醒啲啦！
金盃前晚開三個上盤，包括巴西亦都開齋。由洲際國家盃開始，巴西連開五個下盤，球迷長捧佢哋真係輸甩褲；但喺前晚對哥倫比亞場波，森巴兵憑猛將卡卡入兩粒贏二比○，終於幫球迷贏番次；但係下場對美國唔易踢，球迷想捧佢哋嘅話真係要諗真啲。
喺前晚對古巴入四粒嘅美國前鋒當奴雲，真係夠班喺歐洲踢波，但佢覺得喺利華古遜會冇正選，寧願繼續以借將身份效力美職球隊聖荷西地震。計我求大俠話當奴雲應博一鋪，利華古遜嘅攻擊球員唔係乜嘢好貨色，如佢肯返德國，話唔埋會得到重用。
拜恩被控強姦，愁嘅唔止係拜恩同佢老婆，就連負責體育市場推廣嘅都愁雲慘霧，重話同「沙士」冇分別。梗係喇，拜恩一向形象健康，啲體育用品都樂意搵佢做代言人；當正呢個「八號仔」係大藍籌。點知今次連佢都搞單咁嘅嘢，你話以後啲體育公司重點敢搵咩代言人呀？