金豐鴻運代理嘅上海新盤駿豪國際，喺「沙士」肆虐期間開賣，全部六百個單位，依然可一日內沽清，早排金豐帶記者去上海睇房地產展時，順道參觀吓呢個咁好賣得嘅樓盤。我哋一班記者諗，個盤已經賣晒，重有乜好睇呢？點知畀幾個設計獨特嘅示範單位吸引住，重睇到唔捨得走㖭。
駿豪國際嘅位置同性質，都類似香港嘅會景閣，每層有三十個單位，面積只有四五百呎，全部一房間隔。不過，示範單位就大玩開放式設計，張床同浴缸並排，又或者浴室大過間房，設計反傳統，比起香港樓盤示範單位規律化嘅裝修大膽創新得多，蘭西大開眼界。
更意外嘅係，呢批單位好受內地人歡迎，想買示範單位嘅買家因為太多，搞到要以拍賣方式出售，價高者得。聽講其中一個賣到一百五十萬人民幣，呎價二千七百幾，比一般單位高三成半，貴過不少內地豪宅，亦高過香港新界樓。
信和屯門海典軒嘅售樓處以「水上白宮」為主題，為咗襯番個售樓處，周末特別請咗兩位外籍靚女助陣，充當model，同參觀示範單位嘅準買家影相留念。信和重安排咗專人用寶麗萊幫睇樓客影相。現場所見，靚女除咗受男士歡迎外，女士們都唔執輸，要同佢哋影番張靚相留念。
為咗配合主題，兩位模特兒嘅服裝都經過悉心揀選，係二十世紀初嘅歐洲服裝，加埋佢哋手上嘅扇同埋首飾，優雅大方，充滿宮庭色彩。除咗兩個靚女之外，重有英式茶點招呼，樣樣都襯到絕，噚日天氣雖然唔係咁好，但係都有唔少準買家睇樓歎茶點。
東莞樟木頭有「小香港」之稱，置業國際調查報告話，多年嚟北上樟木頭置業嘅香港人接近十萬，當地新樓盤，佔九成會來港發售，商場都唔例外。
近期有一個南方汽車博覽休閒購物中心來港招商，仿效本港發展商，提供一大堆優惠吸引客人，最有睇頭應該係提供半年免租期。另外，重會免收首年工商務費、管理費同埋市政衞生及治安管理費。
呢個購物中心坐落樟深大道，佔地超過六十四萬方呎，分三層，總樓面近五十四萬方呎，係樟木頭十二項重點工程之一，好有份量。
仲量聯行首次出版嘅《企業房地產影響因素研究報告》話，企業房地產漸受重視，重發展成一門專業㖭。呢項研究獲得亞太區內超過五十家具影響力機構嘅行政人員參加，其中四成二受訪者嚟自金融業、三成八係資訊科技及石油業，其餘係傳訊業同商業服務業。
原來企業房地產行政人員最關心嘅係點樣減低房地產支出。
仲量聯行企業綜合解決方案部國際董事PhilSimpson話，其實好多企業，將時間同資源集中喺短期嘅慳錢措施，忽略能帶嚟長遠收益嘅基本方針，如重組或調整房地產組合、改善採購程序同合約管理技巧，同重新策劃物業管理程序等。
PhilSimpson講，約有兩成受訪者認為，工序外判係企業房地產策略嘅目標之一，呢個趨勢未來幾年都會持續。因此，預料未來幾年香港同新加坡將會俾低成本城市「搶走」唔少次級寫字樓客源，假如星港兩地都唔能夠吸引更多企業租用高級商廈開設總部，或者發掘新客源，最終會令商廈出現供過於求。
仲量聯行嘅調查又發現，有三成六受訪者首選新加坡為設立跨國地區總部，兩成七揀澳洲，揀香港嘅只得一成九。
蘭西
電郵地址：