有個唱功幾好嘅新進女歌手，雖然係同性戀，但佢年前出席某前輩女歌手嘅聚會時，前輩女歌手介紹咗個年輕有為嘅契仔畀佢識，當佢知道對方係富家子嘅時候，竟然為咗貪小便宜兼拉近同前輩歌手嘅關係，而向前輩歌手暗示對佢嘅契仔有意思，叫前輩做媒。
之後，前輩女歌手安排好多機會畀富家子同新進女歌手，富家子重動咗真情，做晒觀音兵管接管送。不過，當新進女歌手發覺對方嚟真時，佢就費事再貪小便宜，即刻搵個藉口同個富家子分手。
蔡依林（Jolin）日前去咗吉隆坡出席「看我72變」簽唱會，佢當日着咗件白色背心同短裙，Jolin喺影相時重笑笑口話：「等我拉一拉裙子，否則攝影師就會拍到我的內褲，雖然我裏面穿了件可愛的東西。」之後，Jolin喺跳舞時又不斷扭腰，向在場歌迷大派冰淇淋。
廖啟智同陳敏兒嘅三歲囝囝，近日患咗血癌，要喺醫院接受化療。智叔近日忙拍新劇《樊梨花》，同智叔有唔少對手戲嘅胡楓噚日出席完喺大埔嘅活動後接受記者電話訪問，佢話：「上星期我同智叔喺公司餐廳講笑，見佢冇嘢咁樣，不過，佢份人好多嘢都會擺喺心度，我唔知可以為佢做乜，惟有祝福佢個仔早日康復。」
何韻詩噚日接受港台車淑梅訪問，大方講自己嘅感情生活，問佢有冇拍拖，佢話：「𠵱家都幾穩定，我都係第一次有一段咁穩定嘅感情，因為以前唔係有第三者，就係我係第三者，好鬼複雜，所以我𠵱家都好開心，呢段情畀到我安全感。」唔知佢另一半聽到之後會唔會開心死呢？
