上周六同女朋友Shopping，居然撞到經紀陳，佢話估唔到Juno事件搞到咁大，連老竇炒股票事件都被雪糕佬拎出嚟講，重拉咗多人。今日啲炒股難免有多少壓力，所以提醒小初要小心。
小初又唔係咁擔心，皆因今次港股炒風，基本上同以往紅籌或科網股熱潮有多少唔同，唔係純粹炒概念咁虛無縹緲。
家陣好多升到你唔信嘅股票，大部份都係有實力嘅工業股，唔少被基金睇中持有。由於芬佬唔同莊家，唔會因為小小風吹草動就被Call孖展及斬倉，除非係芬佬轉View，又或者公司基本因素出現大變，否則呢類工業股唔會好似莊家股咁忽然大跌。
可能係芬佬坐齊貨嘅原故，所以好多工業股嘅股價愈挾愈高，好似勝獅貨櫃（716）咁，4月搞過一次先舊後新配股，以每股2.15元配售60球貨，令股價一度受壓，但好快趣股價已經回升，最高重見過3.60元。
勝獅近排股價略為回落，上周五微跌唔夠1%，收3.275元。經紀黃話，芬佬仍然坐住一大批貨，有分析員同公司高層會完面後，話一切如常，所以毋須擔心。
慕容小初