個幾星期前，大使放工返到屋企，收到一封黃澄澄嘅信，係由稅務局寄出嘅，大使即時心花怒放，懷住以前做學生嗰陣翻開成績表咁嘅心情，拆開封信一睇，嘩！有成四位數字嘅退稅。第二日返到公司，同事們都熱烈討論點樣去花呢筆意外之財。同事甲話去買護膚品、同事乙話去旅行、同事丙話會將部份退稅捐出嚟做善事。咦？做善事？好提議喎。
政府呢次退稅行動，全港有一百三十萬名納稅人受惠，當中超過五十七萬人獲退還上限三千蚊，總退稅金額達到二十三億。當然，政府原意係希望市民將啲退稅購物，刺激疲弱嘅消費市道，而好多商戶已經開始搞退稅優惠，大使亦都樂於見到呢個現象。正如曾志偉日日喺電視上面講，買個菠蘿包都可以振興經濟啦。
之不過咁，喺刺激經濟之餘，大家都可以考慮吓將部份退稅捐出嚟做公益。如果一人捐一百蚊出嚟，就有一千三百萬，呢筆錢話多唔多，不過已經足夠令到貧苦大眾受惠，希望大家明白施比受更有福嘅道理，話時話我哋蘋果基金幫嘅對象層面都幾廣，上至老人，下至細路，病到冇錢睇醫生，窮到冇飯開、冇錢開學等等……只要合資格，我哋都會幫得到，各位不妨考慮吓！
暖流熱線
電話：29908688
傳真：23702192
電郵：
網址：