每年暑期都係腦場出機旺季，事關班學生客最鍾意趁住呢個悠長假期，自己砌番部腦玩吓。學生客對電腦系統要求特別高，無他，學生客唔似返工搵食嘅人以上網、處理文書為主，佢哋多數顧埋打機，Config.高啲，唔怕第時有新Game對應唔到。
𠵱家Intel最快嘅P4係粒3.2G，但係個價去到$5,070，齋粒U已經夠你買起成部腦，所以好多人都用觀望態度，一望自己荷包有冇水，二望等佢稍為落價。所以呢期腦場最熱賣，就係嗰粒行800MHz、512K、Hyper-Threading嘅P42.4G，一來佢嘅速度已經好夠用，二來以後每加0.2G，都要加成$300-$400，真係就咁都超到上去啦！
記者、攝影：朱崇德