八方噚日講過，政府總部對記者採訪嘅新限制，始作俑者係新聞處處長蔡瑩璧，唔知佢係咪管開有癮，前日董特首搭飛機上京，佢原來都嘗試喺頭等機艙劃定採訪區！
話說前日有三名記者同董特首一齊坐頭等艙，坐商務位嘅蔡瑩璧一上機打個突，之後全程三個鐘不停進出頭等艙護駕，重叫記者唔好「搞住」董生，更加唔好騷擾其他乘客。有記者後來同八方話，真係畀蔡小姐激死，事關佢哋就係其中三位乘客，真係唔知邊個騷擾邊個。
之後重搞笑，記者想影張相、拍幾個片段，點知蔡小姐一一拒絕；後來又話雖然董生都係唔願意上鏡，但就可以畀個offer記者「中間落墨」，喺近洗手間嘅走廊拍攝，重想叫電視影先，報章之後。唉，上咗飛機，又唔係政府總部，點到你話晒事呀。
傳真︰2623-9278
電郵︰