香港上周好事唔多覺，衰嘢就一籮籮：剛剛公布嘅失業率，再次刷新紀錄，升到去8.6個巴仙；我哋個「特衰正苦」有兩位高官同一日先後辭職；歌壇則有多位高層人士涉嫌買票而被查，搞到上周差唔多日日都係呢啲負面新聞做頭條。
雖然呢幾單新聞對港股影響唔大，不過麥老闆同Juno被老廉邀請協助調查後，就有人借消息將隻海爾中建（1169）踢落3毫樓下，不過翌日已見幾個大牌護航，踢番上3毫樓上。有位熟悉海爾嘅朋友講，海爾一路都有跟進孖一六九嘅注資計劃，不過𠵱家未係注入白色家電嘅最佳時候，但佢叫伏勝留意，若再見股價落到３毫水平，就不妨入貨，因為隻股隨時會再開車，跟住就好難再見呢個價。其實伏勝都諗住吼價買，皆因注資係遲早問題，淨係計品牌值400億元人民幣，你話隻股將來會值幾多錢？
在上一輪工業股炒浪中，多隻工業股炒到飛起，有部份重升咗成個開有多。不過，遇啱上個禮拜個市唔就，大部份股份都跌番十零格，其中隻德發集團（928）更由最高82仙水平，跌到最低7毫子，回吐幅度達15%。
一向以來，伏勝都對德發幾有好感。有個朋友話佢哋今年業績會好靚，原因係上半年已經差唔多接夠全年定單。如果消息冇錯嘅話，今年下半年只要唔好有閃失，盈利應有可觀增長。個朋友重話，如果隻股係7毫子唔散得，班炒家又會好快開車，今次目標價係上次高位82仙。肯冒險而有錢坐貨嘅話，不妨買番多少，個零禮拜後應該會有意外驚喜。
伏勝