早前，筆者參加咗一個駕車旅行團，跟過往不同嘅地方，會係今趟並非響單一國家或地區四處遊逛，而係從新加坡來回馬來西亞走一轉，可同時欣賞到煩囂城市跟純樸嘅鄉村景色外，更可以領會到兩地截然不同嘅民風；若然各位有興趣的話，下次有機會不妨試吓，真係跟一般旅行唔同㗎！
記者、攝影：李勤
鳴謝：香港加德士有限公司
香港有告士打道嘅「汽車一條街」，原來響新加坡當地，亦有相若嘅情況；位處鄰近市中心區嘅麟記路（LengKeeRoad），兩旁就有為數十多間嘅歐、日同韓國車代理陳列室，每間規模都有成四、五千尺過外。其中，當地豐田及凌志代理位處嘅麟記路33號，地下為敞大嘅陳列室，又有大型維修部同接待處，單係地下樓面嘅規模，經已叫人目瞪口呆。另外，據聞豐田代理去年響新加坡嘅總銷量，經已進佔冠軍位置，平均每月銷量，更高達過千部㖭！
今趟有別傳統嘅駕車旅遊，承蒙香港加德士有限公司全力贊助，為數近20部清一色豐田Corolla車隊，既有新款又有舊型號，從新加坡北上馬來西亞，來回旅程近一千公里。沿途上由有關方面派出後勤車輛支援，雖然曾出現過迷路，又或者有車輛發生輕微交通意外，但總括四日三夜嘅旅程，仍能夠順利完成。
原來響假日或長假期時，都有好多新加坡或馬來西亞居民駕車到別處地方遊玩，而兩地邊境嘅檢查手續亦見簡單方便，就連我哋由香港遠道而來嘅旅客，亦只需出示護照、申報停留日期及住宿地點便成，當然少不了重有即場探熱啦！
由於新加坡係一個現代都會城市，跟香港市面相若，故整個旅程較集中於馬來西亞國內，沿途所見好有鄉土風情。再者，兩地路標清晰以英文為主，就算係自助旅遊，只要有地圖在手，亦不難找到目的地。然而，沿途有大小不一嘅市集，當地居民既友善，又懂得廣東話或國語，除予人有親切感外，購買土產飾物，又或者新鮮水果，講起價來都特別容易溝通㗎！
今趟別開生面嘅駕車之旅，特別之處並非局限於單一國家或地區，而係需要駕車穿梭新加坡及馬來西亞兩地，對比起兩地嘅風土人情及地貌可謂截然不同，兼留下深刻印象呢！