一年前，峯峯和霆霆都是百厭仔，今日又乖又識守規矩，原來都是為了要成為真正的劍道小子！看他們耍兩招，不但劍劍有力，自信心同專注力都強了許多，更學懂尊師重道！不過，兩人愛劍道的一大理由，竟然是堂堂都可以不留情地打大哥哥……
記者：梁佩芬 攝影：林栢鈞
入課室前，要先躬身敬禮，這是日本劍道的入門儀式。如果俾教練發現你沒有鞠躬，就要從頭再做過，才可開始練習。
初初學劍道，不用穿道袍，因為褲子又長又大，老師看不到你的步法正確與否！
未練劍前，一定要先跑步，再做柔軟動作，鬆鬆筋骨。先要背劍跑圈五分鐘，霆霆好似有啲喘氣喎！
熱身後，分組練習，霆霆及峯峯已經不是初哥，可以與大哥哥一齊學高層次的劍術。看看他倆多麼專心聆聽教練的說話！
小孩上堂不用穿戴盔甲，所有「捱打」的角色，都落在師兄身上。今次霆霆要打肥師兄的頭，哈哈，非常準！
日本人最着重行禮的動作，所以一開始就要學正式的坐法，要張腿又要腳掌緊合，都好困難。
Nancy新入門，還未可以與師兄較量，要由教練親自指點出招。出劍要直，最好一打就中目標，初學就要多練習對準目標。
峯峯和霆霆穿起道袍特別威風，這種邊快步行邊打對方頭、肩、手及腹的動作，目的是提升反應，每堂必練。
Nancy（11歲）
平時都有玩籃球、游水的Nancy，學了三堂，覺得最難就是記步法，尤其前後左右成日搞到亂晒，惟有每堂完畢後，返屋企練習多幾次。
晉霆（6歲）
學了大半年，覺得一啲難度都無，「比打遊戲機重易！」每堂最開心，就是與師兄互相練習的時間，「好好玩，可以大大力打過去，但我好多時想打頭，又打咗膊頭；想打膊頭，又打咗手肘！」
競峯（6歲）
競峯四歲半就開始學劍道，成為一時佳話！因為爸爸想他學一下日本武術，能強身，又可學傳統的禮貌，學咗年多，媽媽話佢真係乖咗！
劍道剛柔並重，由6歲至60歲都啱玩，不過梁教練不主張全班小朋友一齊學，因為太多小孩會好混亂，又常常互相比拼劍法，容易發生意外，所以大人小孩一齊學就最理想。
年齡：六歲或以上
學費：$150（8堂）
日期：24/7起
地點：紅磡、天水圍、西灣河及青衣
查詢：25048145（香港劍道總會）
網址：