Beyond成員黃貫中（阿Paul）素來敢言，他昨日大罵現今樂壇烏煙瘴氣。阿Paul已離開環球唱片，對於廉署拘捕環球高層陳少寶，他勸黃家強不要致電陳少寶，否則會被邀往助查。
樂隊Beyond、許志安、楊千嬅、黃伊汶、盧巧音和余文樂等，昨日在尖沙嘴HMV出席宣傳活動，Beyond成員黃貫中早前完成最後合約一張唱片，便正式與環球唱片約滿。一向敢言的阿Paul，昨日大罵現今樂壇烏煙瘴氣。
對於近日的樂壇貪污案，阿Paul說：「（樂壇）不嬲都烏煙瘴氣，𠵱家重搞到犯法。」黃家強卻提醒阿Paul該案廉署正在調查中，尚未有人被定罪。對於有人涉嫌買獎，阿Paul說：「我唔相信，係就真係慘。」
問Beyond可有問候日前被廉政公署拘捕的環球高層陳少寶，阿Paul指了指黃家強說：「你打畀少寶，拉埋你去查。」黃家強答：「怕乜？我行得正企得正。」阿Paul又笑說：「我哋喺樂壇上位咁慢，咁咪行得重正。」
樂壇貪污案揭發樂壇黑幕，阿Paul可覺自己是受害者？他說：「我唔會太介懷，咁多年我哋睇得好開，我希望有廉潔嘅社會，同廉潔嘅樂壇。」
此外，安仔昨日表示鄭秀文是他人生中的重要人物之一，安仔說：「我同佢講，事實上人生先係最重要，我續約正東，佢都有恭喜我。佢係一個天后，壓力大過我，有機會我會同佢調適吓。」有報道指安仔知道正東有意斟介李克勤，他即壓價續約，安仔說：「佢過埋嚟重好，可以一齊合唱。𠵱家有邊個歌手比三年前唔跌價？我係降咗價，咁嘅巿道邊個會升？」
此外，盧巧音和何韻詩都贊成四台舉行聯合頒獎禮，盧巧音說：「咁樣樂壇團結啲，唔會有咁多豬肉獎。」
採訪：汪正文
攝影：陳偉權、甄朝健
