天后濱崎步上年出嘅細碟《H》，成為同年唯一一隻賣過一百萬張嘅細碟，我羅拉都解釋過，呢個大可以歸功於一碟內有四隻新歌，唔係咁鬼抵買，邊有咁多人買先得㗎？今年都過咗一半有多啦，有心做日本唱片大賞三連霸主嘅步姐，都係時候有搞作。果然，佢最近就推出四歌細碟《&》，亦係一碟四歌，今次重首首勁落重本拍ＭＶ，買咁重保險，睇怕點都箍到啲大獎返嚟啦啩！
步姐喺《&》裏面一曲《Ourselves》嘅女魔造型雖然出咗街，但我羅拉依然千辛萬苦挖到其餘兩首歌《Greatfuldays》同《HANABI~episodeII~》MV入面，幾個截然不同嘅look畀讀者先睹為快。
講真我睇完有啲失望，因為全部都似曾相識。首先近排成日騷舞技嘅步姐，喺《Greatful》裏就大跳勁舞，不過佢全身士多啤梨紅嘅打扮，講真娘到唔似會出現喺步姐身上，另外一個玩水喉look又令人覺得抄《神探俏嬌娃》啫。
至於《HANABI》入面嘅沙灘高雅淑女都算省鏡嘅，但短髮rock女步姐就肯定見過啦。唔通步姐已經技窮，再變唔出咩新花樣？