現年四十五歲的鄭裕玲（嘟嘟）和呂方拍拖十年，卻無意結束愛情長跑，因他們不會有結婚計劃。嘟嘟大談跟男友的相處之道，她表示除了要有充份溝通，還要保持各自的空間。嘟嘟從前性格悲觀和執着，但與呂方相處後，被對方樂觀的性格感染，漸漸放棄了從前的執着，人亦變得更開心。
鄭裕玲待人和處事素來嚴格，曾一度被指過份挑剔，她不諱言自己亦知情，但嘟嘟近年不知不覺已放下了這些執着。
嘟嘟日前在無綫電視廣播城接受訪問時說：「我可以講係受到呂方、同埋媽咪離開嘅影響，我有啲執着都改咗，我一樣對自己有要求，但就盡量包容人哋，唔想令到身邊嘅人難堪。加上人都長大，思想就更成熟。我都入咗行二十八年，唔通重唔化咩？」
嘟嘟轉眼已與呂方拍拖十年，問到她如何維繫這段感情，她說：「最緊要係包容對方嘅缺點，留空間畀大家，無論親人、情侶或朋友，每個人都係獨立個體，會有自己嘅興趣。尤其情侶之間，彼此之間嘅思維可能會好一致，不過遇到某啲問題有歧見，大家一定要拎出嚟商量，一齊成長，切忌大家行嘅方向一個東一個西。」嘟嘟明白沒有一個人是十全十美，就算呂方都不例外，嘟嘟說：「如果一個完美嘅人十分滿分，我自問有八分，而呂方喺我心目中有七分，每個人都唔可以去到咁盡，有空間先可以不停改進。」
嘟嘟自幼父母仳離，令她產生童年陰影，她早已透露不會結婚，她認為一紙婚書不及情侶之間承諾重要，那現在呂方可是嘟嘟心目中的終身伴侶？嘟嘟說：「唔知喎，好難講，我哋會好努力維持大家嘅關係，我都應該向好嘅方面去諗，nothingis100%（沒有事情是百分百），我可以講嘅係一定會努力。」
嘟嘟除了不結婚外，亦堅持不生育，她說：「因為我性格自私，我𠵱家好享受人生，唔想對下一代作出賭注，造一個人出嚟要畀好多時間佢。況且我年紀唔細，唔通重做高齡產婦？當我將來有閒暇，寧可去助養小朋友，幫助世界上有需要嘅人。」
呂方近年的事業不及女友嘟嘟順暢，她說：「佢自己係一個快樂嘅人，性格又樂觀，佢好識尋找快樂，香港人吓吓只為錢，但我哋就覺得享受人生先係真正快樂。其實我以前好悲觀，自從跟呂方相處後，佢都改變咗我好多。」
此外，嘟嘟每次出席公開場合，必定行頭十足，她表示自己很捨得花費在置裝上，曾試過一季買下七十萬的衣服，絕不肉赤，嘟嘟說：「我好鍾意着新衫，上一季嘅衫一係賣去二手店，一係送畀朋友。」
