拉素啲波好就好嘞，但部份球迷成日作出種族歧視劣行，就令人不敢恭維。好似前日佢哋贏車路士場熱身賽，對方黑人球員哈索賓基首當其衝被侮辱；咁重唔止，佢哋連自己友利華蘭尼都唔放過，不斷出言侮辱，死性不改真離譜。
據報話，每當哈索賓基掂波，拉素球迷就會扮馬騮叫嚟侮辱人哋，完全唔理人感受。利華蘭尼重慘，俾自己球迷侮辱肯定重無癮。教練文仙尼睇唔過眼，下半場索性換走利華蘭尼，賽後更批評己方球迷無品。
查實拉素球迷，甚至球員（米赫洛域）以前都試過衰種族歧視呢家嘢，累到球會被罰錢。罰錢事小，形象事大，再咁落去，隊波踢得幾好都無用，難登大雅之堂。
甘莫蘭尼斯因為遲咗返祖雲達斯開操，搞到總監莫治不知幾嬲，公開鬧佢應該要識分邊個係老細，邊個係員工，重警告話如果佢態度唔改善，可以另謀高就。呢位阿根廷中場又係爭唔落，話晒佢響歐冠盃決賽踢到不知所謂，早已失寵，𠵱家再唔守紀律真係博唔撈咩。
愛華頓前日響季前熱身賽贏咗支奧地利地方球隊四比一，取得熱身賽兩連捷；不過李鐵連續兩場都擔任後備，落場後又表現平平，比起其他幾個中場隊友，好似加維臣、甘美爾就失色得多。李鐵始終未落實轉會愛華頓，𠲖家正係爭表現嘅時間，真係要加把勁啦老友！
國內消息透露，皇馬決定取消二十九號同雲南紅塔比賽，改由皇馬正選隊撼後備隊。睇怕呢幕「左手」打「右手」，雙方都會鬥錫身。講到尾，皇馬都係擔心紅塔球員心紅博上位，一吓唔覺意為場練習賽整傷佢哋班球星咪死，𠵱家改為「左右互博」除笨有精。
唔見咗一排嘅前NBA籃板王洛文噚日突然開記者會，宣布希望復出，話自己近四個月努力keepfit，減咗成二十磅。但呢匹「臭馬」今年已經四十有二，而且超過三年冇點過波，𠵱家話復出重要揀帝王、湖人同網隊呢啲班霸㖭，我求大俠真係好懷疑佢成功復出嘅機會有幾高。