七月十一日本欄講《尖子無謂讀中七》，引來三位女學生批評。其中一位係DGS畢業，現在喺港大讀三年班嘅Z，Z小姐話女拔萃嘅中六中七係「蜜月時光」，學生可以參加好多課外活動，學到好多課本外事物，學生開心到極，所以唔讀中七係大損失，而且讀完中七，入到大學，就容易適應好多。Z小姐現身說法，冇人會反駁，可惜香港唔係間間學校都好似女拔萃咁好玩，你嘅經驗可能係以偏概全。如果全港中六中七嘅學生都好似女拔萃中六中七學生咁掂，當然做尖子嘅，都唔捨得離開啦。
另一位應屆高考女生Tracy就話「我們這些寒窗苦讀了兩年，辛苦應考的高考生……尖子們選擇透過尖子計劃提早讀大學，無非只想避開比會考辛苦得多的高考。」嗱，照Tracy所講，讀高考甚為辛苦，邊度係Z小組咁講嘅honeymoonyear，你估個個係女拔萃精英咩！
Tracy話四百個尖子「嚴重剝削了我們高考生入讀大學的機會」，其實講唔通。教資會規定八間大學每年收生唔超過一萬四千五百人，就算收咗四百幾個尖子，仍然有一萬四千個位，況且呢四百幾個尖子如果考高考，幾乎十拿九穩。你喺會考爭唔過佢哋，一齊考高考亦未必會爭得贏，試問有乜損失？對其他透過JUPAS入學學生有乜嘢唔公平？如果你係會考尖子，讀完中六就入大學，絕對係正確選擇。如果你唔係尖子，苦讀兩年一樣有機會，唔使憤憤不平喎。