嘟嘟在娛樂圈中人緣不錯，她跟周潤發、賈思樂、汪明荃（阿姐）和寇鴻萍等都私交甚篤。平時不用開工，嘟嘟必定期相約身邊老友聚舊。
嘟嘟和阿姐經常在無綫大騷中碰頭，兩位姐級的行頭往往成為傳媒比較的焦點，嘟嘟表示從不會因為這些新聞與阿姐心存芥蒂，她說：「我同阿姐每個月得閒都會相約食飯，大家唔會因為嗰啲新聞唔開心。」
至於好拍檔周潤發，嘟嘟說：「基本上我唔會成日同發仔見面，但每次再見番時彼此都有一份親切感，呢份感覺，我相信係因為當年合作《網中人》時相處十個月產生嘅，大家一同成長。」嘟嘟大讚周潤發是一位不可多得的好拍檔，她說：「同發仔合作，佢永遠好照顧對手，演員之間有咗呢啲溝通，就好易擦出火花。」
嘟嘟入行二十八年，緋聞卻不多，只是在參與無綫處境劇《男親女愛》時跟拍檔黃子華傳過緋聞，重提舊事，嘟嘟即時呼冤，她說：「無端端傳咗呢單緋聞，我真係好唔抵。坦白講子華份人係點，我真係清楚。記得拍緊《男》劇時，時間好趕，唔使埋位，大家各自讀稿，收工又各自離開，但撇開緋聞，我真係好欣賞子華嘅演藝才華。」
撰文：比華利 攝影：何國豪
