陳冠希（Edison）、趙頌茹（阿Yu）同埋楊千嬅，前晚喺將軍澳電視廣播城錄影《勁歌金曲》。Edison同阿Yu之前傳過緋聞，Edison事後重暗示係俾阿Yu嘅唱片公司人員利用，借佢做宣傳。
Edison前晚同阿Yu碰面，大家都好尷尬，阿Yu重好避忌咁彈開。成晚Edison同千嬅雞啄唔斷，反而同阿Yu就一句偈都冇傾過。
問Edison做乜唔同阿Yu傾偈，佢話：「唔係阿Yu嘅問題，佢唔止一個人入嚟，重有佢唱片公司嘅人喺度，我點知乜嘢應該防，乜嘢唔應該防。千嬅請我做嘉賓，我咪同佢傾多啲偈。不過我同阿Yu係冇嘢。」
阿Yu就話：「我見到你哋（指記者）一窩蜂湧嚟，我咪讓個位畀你哋囉，但又話我避，我哋之前都見過面。」記者講番Edison嘅說話畀阿Yu聽，阿Yu話：「我打電話問吓佢，我哋冇打招呼，因為我準備出場跳舞嘅心情。」
黃凱芹噚日出席完黃埔一個保齡球活動後，就即刻買鮮花去法國醫院，探啱啱生完囡囡嘅黎瑞恩。黃凱芹逗留咗大約一個鐘，佢離開時話：「我同阿恩嘅父母一齊去睇BB，佢好靚女，好似佢嘅爹哋同媽咪。我買紮花去探阿恩，諗住畀個驚喜佢，阿恩成家人都好開心。」
女子組合2R噚日同Rosemary一齊喺會展行婚紗show，2R第一次着婚紗表演，所以佢哋都小心翼翼。不過家姐Rosanne差啲俾婚紗絆倒，好彩佢識扮鎮定繼續行。而二十一歲嘅細妹Race嘅心態原來同張栢芝好似，都係想二十三歲結婚，之後就生仔，不過睇嚟啱啱加入娛樂圈嘅佢，要將目標延遲喇！
蕭正楠同文頌嫻噚日喺荃灣出席無綫活動並擔任兒童大使。蕭正楠有份主演嘅新劇《戀愛自由式》二十八號播出，佢對套劇好有信心，重諗定點慶祝㖭，佢話：「請食飯啦！」問蕭正楠有冇新招宣傳？佢話：「冇呀，諗過裸泳，不過俾人ban咗，唔緊要啦！佢哋都着過泳衣出嚟啦！」
薛家燕（好姨）成為名古屋燕窩月餅代言人，噚日喺西貢成豐片廠拍廣告。好姨喺廣告中有兩個造型，分別係日本look同飄逸look。公司稍後重會推出家燕媽媽曲奇餅同麵包，問好姨廣告酬勞有幾多，佢話：「有七位數字，之後重會有分紅㖭！」
