等足5日，終於又等到放假喇！外面陽光燦爛，真想好好玩餐飽出一身大汗。約班Friends出海吹吹風舒服又浪漫，打場WarGame夠晒爽，一班人吹水BBQ熱鬧又開心，可惜假期只得一日，心多多點算好？我有一個好介紹，不妨叫齊幾班Friends，一齊湧入西貢，就可以一次過滿足晒你三個願望啦！
記者：陳慧敏
攝影：陳智良 MakeUp：Emily Hair：Carina
Model：Ricky、Yan（AllFromDreamDestination）
至正
一到埗，即刻殺去四驅車場，一嘗四輪飄移的快感。車場佔地三萬多平方呎，四部四驅車只有煞車及加油掣，就算唔識揸車都很容易操控，最快可以去到50km，速度唔算太快。四驅車於茂密叢林內飛馳，3米寬泥地跑道曲折崎嶇，頗為刺激。「懶醒」的我見佢操控冇乜難度，於是一上車就按盡油門尋找超快感，一路行才發現小覷了跑道的崎嶇度，結果要用5分鐘才完成整條路程。在此奉勸首次試玩的人士，為安全計還是不要開得太快。沿車場直入，還有大片遙控飛機場，$100無限時任放，不過飛機要自備。
至激
WarGame場佔地約64萬平方呎，7個戰場包括茂密叢林、低勢山坡、溪澗、寬闊的大草原，可同時容納200人開戰！裏面還設有戰壕、車胎、木箱讓你左閃右避，飛身上落絕無問題。不過要儲齊8人方可開戰，圍內Friends未必個個有興趣，但每逢周末都有大批「散兵」在此廝殺，想Join埋開戰話都冇咁易。戰場可帶私家武器，但要給負責人檢查，以免違規。為免有人「賴死」唔肯死，兩位戰場負責人──澳洲及英國退役軍人都會出席，身兼教練及裁判一職。中槍還想做逃兵？冇咁易！
收費：
1.$280全包，提供英、美、德軍制服及武器全套（包括槍、衫、褲、防毒面具和手套），連飯盒一個及來回市區專車。
2.$160，設備自備。
時間：11:00am-5:00pm
至歎
出完一身汗，最好就是出海吹吹風，醒一醒神。坐5分鐘魚排接駁的船出海釣魚絕對是一個好節目，魚穫保證不差。眼見排主放下魚餌，未夠1分鐘已經有條一斤重的烏頭上釣，真巴閉！嫌冇乜難度的話，轉個彎就可以往外圍大海繼續釣，難度高不過收穫隨時更豐。排主還會教你分辨魚類及釣魚技巧。魚穫全部可以帶回《龍村樂》，加$30（視數量而定）的水電費，排主就會幫你特製風味海鮮餐！
龍村樂
地址：西貢西沙路榕樹澳村34號地下
交通：除了於西貢碼頭轉乘的士外（15分鐘約$50），龍村樂還有包車服務：
1.8人車（$80）於西貢市中心小巴總站上車。
2.20人以上包車每位$30（來回），上車地點任擇。
預約電話： 97104033（四驅車、燒烤場和釣魚場）27926033（WarGame場）
備註：所有活動均須預約，另有近60個免費車位提供。
其他好嘢
玩完一日，大家可以圍埋BBQ。燒烤套餐提供食物約11款（包括雞翼、豬扒、牛扒、墨魚丸等），想食得刁鑽也可以自備食物（飲品除外）。嫌BBQ熱氣？這裏還有海帶綠豆沙（$10）及可預訂木瓜雪耳老火湯（約$10一位），體貼到暈！