與踢波「外行」、但睇波「內行」的方力申談足球，滔滔不絕的竟是他；一時講如何鍾情荷蘭隊、偶像是伯金，一時又講到不是自己「心頭好」的碧咸，一時又話奧雲仔夠孝順……，總之沒完沒了，說過不停。 文：徐嘉華 圖：梁祖彝 服裝提供：Reebok
不要誤會以為方力申是利物浦迷，他只是該隊球衣贊助商的代言人，所以非穿「利記」波衫不可。
記：何時開始愛看足球比賽？
方：九六、九七年開始，那時十六、七歲，去朋友屋企、一班人睇波，睇波入門一定係先鍾意巴西、英格蘭隊，但近幾年好大段時間我鍾意咗荷蘭；講到追睇世界盃，好細個就跟爹哋睇。我爹哋係利物浦球迷。
記：為何喜歡荷蘭隊？
方：第一我鍾意他們的「橙色」，覺得件球衣好靚，在球場上好sharp，所以我的網頁都係用橙色。第二是荷蘭隊以前的三劍俠──古列治、雲巴士頓、列卡特，還有朗奴高文、艾雲高文，總之係好強、好有才華的球隊。一直好留意這隊波，就算近期啲嘅伯金、奧華馬斯、戴維斯、史譚、雲達沙等，都是我喜愛看的球員。
記：除了這一隊，還有其他嗎？
方：英超的阿仙奴，因為有我鍾意的伯金；之前佢哋有多名荷蘭球員，近年大部份是法國籍的，我就連法國隊也會捧。反正，荷蘭同法國都係打進攻足球，球員又多直線波，這是我至愛。
另外，好欣賞阿仙奴領隊雲格，他識得用錢去買一些有潛質的人，幾乎次次買賣（球員）都賺錢，好多球員，包括亨利都當佢係老竇。
記：你會通宵看足球賽嗎？
方：會，直播賽事錄咗才看，總係冇即場咁精采。我都會三更半夜起身睇直播㗎！
記：你踢足球嗎？
方：好少。我自細打乒乓波，跟住打籃球，現在一星期也打到三次籃球，但足球就好少打，我唔係好識踢波，覺得打足球比打籃球難得多。
記：利物浦及皇馬快來港表演，你對兩隊的睇法如何？
方：利物浦是一隊歷史好悠久的球會，好傳統英式足球，加上英格蘭國腳奧雲及希斯基在陣，會好受英國人愛戴；今季多咗基維爾，我諗佢哋強咗好多。我都鍾意睇奧雲，佢咁年輕已經好大成就；聽講佢好孝順，喺英國買咗一條街，全部畀家人住。
我唔太鍾意皇馬，覺得太勁、太霸氣，好似大「蝦」細；有他們的波我還是會睇，但鍾意就說不上。剛過檔的碧咸，對他應該係好事，但就覺得整件事好commercial（商業化）；但我好佩服碧咸，能夠由九八年世界盃領紅牌出場令英格蘭喺十六強輸畀阿根出局，回國後就連曼聯球迷也「噓」他，但他可以在谷底攀上高峯，殊不簡單。在上屆世界盃外圍賽射入奠勝罰球取得決賽權，好經典。我自己是運動員，深知受到壓力後好難再站起來，但佢得。
喺赤柱球場「獻技」，講咗踢波麻麻的Alex，勝在表情多多，打龍門時更十足甩繩馬騮，又倒掛又滾地葫蘆，總之百看不厭。
