港股經過前日略為調整後，噚日出現小型挾淡倉，期指由10021挾高至10168，波幅達147點。恒指則由下跌84點，變為倒升44點收市，報10140，成交127.4億元。好友實力相當強，呢個月港股表現可睇高一線，但未知升勢可否持續至下個月？港股經歷沙士、七一遊行，以及港府管治危機都唔散得，相信大難不死必有後福。
地產股造好，恒地（012）與新地（016）皆升逾2%。市傳政府又出招救市，但估計招數不離購回兩鐵物業發展權及暫停勾地，相信效用唔大。Cookie話，其實要挾高樓價好簡單，每年拆八萬五個單位咪得囉，重可以帶動埋拆樓業發展，減低失業率，一舉兩得。
電盈（008）一如所料，噚日復牌後大散，跌10.3%，收4.35元，連批股上板成交，成交金額高達39.6億元。黑客同阿虎講，復牌初期有對沖活動，但經過一輪沽售後，股價點都會重返配股價4.40元之上，唔驚坐過山車，可待股價跌近4元博反彈。
經過電盈批股後，市場游資好似減少，連哥頓都唔敢太進取，將合和公路（737）招股價上限，大幅調低10%，由5.28元降至4.75元。
佑威（627）果真配股，以先舊後新方式配售4900萬股，每股作價0.33元，集資1617萬元。傳聞話係中資接貨，不過股價只反覆上升2.9%，成交亦只係3751萬元，有少少令人懷疑幕後水喉唔係好大。
阿虎