前晚美股唔掂，納指跌幅尤其唔細，好多人都估昨日港股都好難有運行，結果唔係，恒指由最低10012殺番上10140埋單，反而有44點進帳。
是日升幅雖然唔大，但有好啟示，暫時證明一萬點係支持得住，而地產股午市買盤強勁，做龍頭股，有龍頭股，代表個市有得睇。
3大地產股都跑贏恒指，新地（016）升1元，收46.10元；長實（001）升1.25元，收51.25元；恒地（012）升65仙，收25.65元。
全日最巴閉嘅窩輪係新地Call輪9710，收7.5仙，升幅63%，已屬末日，月底夠鐘，溢價1.4%，槓桿率61.5倍。槓桿率勁，波幅自然好大，不過隻輪成交金額唔夠8皮，睇好正股亦唔適合炒呢件，下周一介紹啲正路新地Call輪畀各位參考。
死火輪榜上，排第一嘅又係新地輪，不過係Put，9730收1.8仙，散50%，有12球易手，銀碼都有三十幾萬。隻輪下月中前夠鐘，溢價9.3%，槓桿率256倍。隻輪行使價42元，正股（𠵱家46.10元）到期之時低唔過42元，隻輪就只好用嚟墊煲底。個市有氣氛，正股跌落42元以下機會好微，隻輪最後作廢機會大過唔會作廢。
章盛