前任財政司司長梁錦松終於走人，令到其他名叫「梁錦松」嘅市民，終於可以鬆一口氣，唔使再成為俾人取笑嘅對象。梁錦松睇梁錦松，現年六十七歲嘅退休會計員梁錦松，話阿松係「聰明反被聰明誤」，「佢蠢到離晒譜，人哋一揭發（偷步買車）就應走，唔應該特首叫留喺度就真係留低。」
喺香港電話簿中，以「梁錦松」登記有三人。上面提及嘅梁錦松，住喺牛池灣，提起同佢同名同姓嘅阿松，佢就真好火滾，批評阿松習慣咗以前喺銀行時以炒消息賺錢，先至犯下偷步買車呢個大錯。
呢位梁錦松係天主教徒，連天主教香港教區主教陳日君都識佢，陳主教試過開玩笑求佢：「你唔好加稅呀！」牛池灣阿松又話，團拜時又有教友問佢：「你點解唔去開行政會呀？」
另一位梁錦松係聖文德書院教師，佢𠵱家俾教統局借調去做幫手支援黃大仙區學校嘅資訊科技（IT）教學，打緊半份政府工。梁老師話，佢7.1當日都有上街反23條；呢排阿松走人，佢成為朋友口中嘅話題，對於阿松，佢話唔評論，「政治污糟邋遢！」
傳真︰2623-9278
電郵︰