夏季推出嘅日劇，當然要有陽光海灘做背景，先至可以令觀眾睇到透心涼啦，但係大家知唔知，好多時鏡頭前男女主角着泳衣曬太陽嘅舒暢美景，實際上可能係凍到入心嘅不毛之地嚟㗎！
好似瀧澤秀明同長谷川京子合作嘅新劇《屬於我的麥當娜》，大家成日見佢兩個鬥着少衫卿卿我我，其實取景嘅地點係凍到要着褸嘅長野縣輕井澤，好在佢哋一班演員識得苦中作樂。
好似早兩日劇情講到身為大學生嘅瀧仔，專程去到當地靜心讀書，點知係都要黐實佢嘅長谷川又跟埋嚟，本來瀧仔好嬲，不過長谷川為佢準備咗海邊BBQ，冧得佢鬼死咁開心。現場所見，唔使埋位嗰陣，瀧仔同長谷川都即刻着返件冷衫，配角小泉孝太郎直情誇張到着褸，佢哋一齊同工作人員狂燒嘢食取暖，難怪導演猛咁話：「你哋唔好食晒呀，啲嘢食重要用嚟拍嘢㗎！」
同樣以海灘做背景嘅日劇《StandUp！》，主角二宮和也同鈴木杏就真係放暑假拍拖游水咁feel，休息時二宮重同一班阿伯甘草玩傳統嘅幪眼扑西瓜！