國際米蘭近日買入幾個國腳級人馬，勢必大換血，𠵱家陣營內人心惶惶。隊波日前公布咗季前集訓名單，邊個會被棄用已露端倪。最矚目係塞內加爾中場法迪加懷疑心臟有問題，唔能夠隨隊，國米以前簽過心臟有事嘅簡奴，唔係又搞呢家嘢啩？
據講，國米查到法迪加有心律不正現象，幾大都驗真啲，講明一有問題就取消呢宗轉會咁話喎。查實國米當日搵人去歐塞爾斟佢，都係想催阿積士快啲放尹達美迪，目標達到，又見法迪加唔多貴就當搭多件豬頭骨。假如法迪加因心臟病而轉會觸礁，在商言商對國米當然唔係壞事。
講番呢次集訓名單，簡直係球員去留嘅重要指標。名單中雖然都無托度同埋簡拿華路，不過無人擔心呢兩位大哥地位不保，至於干斯卡奧、古利文派路同埋韋華斯等榜上無名就值得關注，恐怕佢哋……
拜仁巴西左翼薛羅拔圖雖唔擔心今季冇正選打，但驚畀長途電話費畀到窮。事緣佢屋企人喺晒聖保羅，日日都要煲長途電話粥，佢近日向拜仁贊助商德國電訊攞折頭。我求大俠認為，同屋企人溝通係啱，但應以事業為重，如果唔係佢分分鐘俾史高爾或沙里咸美錫搶咗個正選。
碧咸加盟皇馬後令到西甲聯更加矚目，不過有報道就話有十三間西班牙球會未能同電視台就轉播費達成協議，要繼續斟，話唔定好似上季意甲聯咁要延遲到九月中開咧。唔計友賽嘅話，碧咸對上一次踢波係五月，如果西甲九月中至開咧，佢足足四個月無正式比賽，啲球迷真係望穿秋水囉。
西班牙後衞甘普同法迪加命運一樣，都因為體測肥佬，加盟保頓一事受阻。雖然唔知佢肥佬原因，斷估係佢唔夠弗。佢上季以借將身份踢保頓時，係就係表現幾好，重入過吓波㖭，但體能狀態就麻麻。不過無論乜都好，千祈唔好係以前傳過佢患上嘅焦慮症復發就得嘞！
比利時國腳後衞尹貝頓決定留效馬賽，令人幾意外，話晒呢位仁兄係幾支頂級班霸嘅羅致目標，𠵱家有啲龍游淺水嘅感覺。不過諗深一層，拿保夫已經離開馬賽，尹貝頓勢成為後防大哥大；而隊波今年又引入幾個夠份量球員，話唔定殺出條血路，尹貝頓唔走都有道理。