經紀黃噚日收市後打電話畀小初，猛話一早講咗芬佬大把錢，港股未玩完。
噚日朝早大市回落，好多股仔繼續前日跌勢，點知晏晝大市倒升，成批炒股即刻升番轉頭。散戶個心稍為怯一怯，即刻被震出局。
原本跟開基金股嘅經紀黃，噚日竟然同小初品題一隻炒股廣興國際（1131），佢話隻股今時唔同往日，不但止擺脫舊日唔算太好嘅形象，兼且搖身一變成為芬佬最鍾愛嘅紡織股。
廣興噚日公布全年業績由虧轉盈，賺2218萬元，兼派股息合共3.3仙。廣興股價即刻上揚，最高見過1.28元，收1.25元，升7.79%。
小初記得，廣興去年話過想轉型投資飲品業務，股價一度炒到興起，收尾搞唔成就搞併股，早排出現過一啲大手成交後，表現當堂唔同晒。
經紀黃話，呢批非自動對盤交易，據講係有人射貨畀芬佬，最近就有個芬佬申報，揸咗5%以上嘅廣興，因此估計未來股價仍會有表現。
慕容小初