泰國演員冬、陰、功、隆婆（CoCo）同吳君如及杜汶澤等，噚日喺銅鑼灣一間泰國菜館宣傳下周四上映嘅新片《人妖打排球2》，幾位泰國演員重即場表演歌舞助興，大搞氣氛。
君如大談近日廉署調查樂壇涉嫌買獎事件，佢話：「我睇完報道都呆咗，使唔使咁大件事？我十年前做歌星就冇人咁offer過，我都攞過商台新人獎，但當時都未識俞琤。我做咗咁耐DJ，冇人巴結過我。至於樂壇係咪咁黑暗？呢段時間好難作出評論。」
人妖CoCo着透視裝到場，大騷一雙長腿，佢呢次再嚟香港，身形苗條咗，吳君如對CoCo嘅身形讚不絕口話：「CoCo好正，佢對腳好幼，佢本身男人骨架，但女仔身材。」
問到CoCo有冇整過身形，CoCo透過繙譯話：「冇加冇減，我注重健康，我𠵱家都有男友，但重未計劃結婚。」
安雅同舊愛劉恆噚日一齊喺台北，幫一眼鏡品牌做模特兒，佢兩個都話分咗手仍然係朋友。安雅噚日着比堅尼，好鬼性感。問劉恆同咁多女仔拍過拖，最鍾意邊個？劉恆唔揀安雅，佢話係一個歐洲嘅金髮女郎，安雅聽到之後亦唔執輸，話自己最愛嘅男朋友係西班牙人。
周華健為籌備新唱片《LoveHotel》，專登喺台灣嘅酒店閉關十四日作歌，佢噚日同台灣傳媒話，為咗做呢隻新碟，推咗一個信用卡廣告，呢個廣告嘅酬勞有成五百萬新台幣（約一百一十萬港元）。周華健本來冇諗住同傳媒講，但係因為一時口快，所以忍唔住講咗出嚟！
楊怡噚日接受電台訪問，佢話好開心可以去內地拍劇，佢話：「我會去半年，所以我帶咗好多護膚品去。」楊怡又話會帶嘢去玩，佢話：「我會帶gameboy同埋DVD去，重有最重要嘅係帶羽毛球去打，我可以同林峯同伍姑娘（伍詠薇）一齊玩。」
早前證實患上乳癌嘅仙杜拉已經切除左邊乳房，成功戰勝癌魔。噚日佢接受薛家燕嘅越洋電話訪問，佢話：「好番啦！發現時都係初期。」
其實仙杜拉都好勇敢，醫生同佢講，話可以揀切乳房，或者只做化療，佢話：「我唔想手尾長，不如一勞永逸，切晒佢，因為我要surewin。」
