女藝員出得廳堂，又入得廚房煮幾味，真係冇乜邊幾個得，但陳伶俐就係其中一個「稀世珍品」。廚藝拿手的她最擅長炮製中西菜式如蛋糕、果撻、番茄炒蛋，連煲湯都難唔到佢。本以為道行高深的她，已達到無欲無求的境界，誰知這位「職業煮婦」恨煮日式鐵板燒恨到出口。今日伶俐終於有機會一試，但在她如願以償之際，卻發現原來這位烹飪高手竟然怕火！
記者：區佩嫦
攝影：周旭文
服裝提供：2%
伶俐自小已愛烹飪，還記得讀中學時，每星期最渴望上家政堂，「我真係好鍾意煮嘢食，可能又有啲天份，有時人哋教我煮一次，我下次已經煮到出嚟，當然重係好食嗰種。」愛烹調的她，最鍾意食日本鐵板燒。
「我一唔開心就會去食鐵板燒，睇住師傅把食物由生煮到熟，食落口重熱辣辣，感覺好正、好開心。睇得多，有時都想叫師傅畀我試吓玩，不過師傅都唔畀，話佢哋要服侍我哋，唔可以畀我咁做。所以我最想整到一次日本鐵板燒，感受到鐵板燒的氣氛，若果燒新鮮生蠔或者海膽就最好，睇住生蠔或海膽邊燒邊跳，好正呀！」
蠔卷用上新鮮嘅日本生蠔，啖啖肉之餘再配上牛油果及明太子，入口幾惹味。伶俐更鍾意食卷物上的蝦乾及銀魚仔，因為較一般卷物的蟹籽有口感。「雖然個炸蠔卷較為大嚿，但我覺得冇乜難度，味道又唔錯，一於今晚買材料返屋企整先。」眼前個卷物拎上手都唔鬆唔散，連師傅都讚伶俐叻女，極有天份。
材料：
日本生蠔 2隻
日本櫻蝦乾 2湯匙
黑白芝麻 2湯匙
日本銀魚仔 2湯匙
日本 約40克
紫菜 1塊
牛油果 4個
明太子 2小塊
生菜 一塊
伶俐不愛揀飲擇食，冇得試燒海膽便選擇鐵板燒茄子。香軟的茄子用鐵板煎成，軟軟滑滑，配上香口的煙肉、蒜茸及花生粒，一軟一硬口感極佳，加上醬汁令人食到停唔到口。不過，愛keepfit的伶俐則嫌太油膩：「喺屋企我就會將茄子由煎轉蒸，食落冇咁油。」識自我改良，果然夠勁。
材料：
茄子 1條
炸香煙肉粒 2湯匙
炸香蒜茸 2湯匙
炸香花生粒 2湯匙
香草牛油 適量
豉油 少許
酒 少許
做法：
1﹒將茄子開邊後，打平切去茄子的底部，然後用刀將茄子的底面兩邊𠝹成菱形花。然後在鐵板上加少許油把茄子煎熟。
2﹒將煙肉粒、蒜茸、花生用香草牛油爆香。
3﹒把已爆香的煙肉粒、蒜茸及花生鋪在茄子上，落豉油及酒調味，最後灑下葱花便成。
「壽司幾好味，做法冇乜難度，茄子可能落得太多油，覺得好肥膩。不過兩樣都好好味。若果冇廚師幫我，我會畀滿分自己，𠵱家因為有佢哋幫手，所以要扣分，畀自己88分啦。」
「見佢揸住把壽司刀就知佢有姿勢有實際，做出嚟啲食物有職業水準，冇諗過伶俐呢位靚女咁叻。」
店名：Miso
地址：中環怡和大廈地庫15號舖
電話：28458773
營業時間：11:30am-3:00pm；6:00pm-10:30pm（星期日及公眾假期休息）