有幾封讀者電郵問及一啲資料。可以簡單回覆。Chris問Vivaldi《四季》嘅CD版本。其實左丁山對古典音樂認識好有限，冇資格答，不過既然你問到，姑且勉為其難。你手上嘅VanessaMae、Sean-FrancoisPaillard，我未聽過，不敢置評。左丁山通常買暢銷流行嘅版本，就係SirNevilleMariner指揮，由AcademyofSt.Martin-in-the-Fields演奏嗰隻。呢隻《四季》CD，係一九八七年買嘅，聽到𠵱家，你可以試吓。
一位PeterL.讀者質疑本欄（六月二十九日）提及蘇守忠。Peter話：「印象中蘇守忠已經在入獄不久於獄中懸樑自盡，遁入空門之蘇守忠可能另有其人，敬請查證。」非也，一九六六年天星小輪加價斗零（五仙）所引發之騷動，由蘇守忠抗議而起，騷動後警察拉人，一位活躍示威者盧麒被拉，吊頸身亡。蘇守忠冇死到，現在係佛門僧侶。
六月十九日本欄提過一間美國中學寄宿學校，有讀者問網上資料。後查閱一番，發覺最近磅嘅就係位於加利福尼亞州洛杉磯以北千五英里嘅TheThacherSchool，上網搜尋WesternBoardingSchoolAssociation，就可以搵到。呢間學校有男生一百一十五人，女生一百一十五人，開第九至第十二班，畢業生多數進入全美排名前二十五名嘅大學。學校自1889年創辦，歷史悠久。香港學生嬌生慣養，入到去初期要適應吓，啲父母千祈唔好同仔女喊埋一份！