港府連失兩高層官員，但從港股初段表現看來，反應不大，似乎繼續當董家班管治危機冇料到。不過，投資者午市見外圍股市下滑，驚住美股可能繼續調整，港股沽壓才開始增大，恒指收報10096，跌110點，成交117.2億元。
七一大遊行已超過兩星期，阿董噚日才站出來對市民訴求作出正式回應，唔知大家有乜反應？阿虎則自問好寬容同好有耐性。噚日聽完阿董回應後，都降咗唔少火，如果佢肯正式認句錯，咁就更加好，甚至民望都有望回升，可惜佢死都唔制。以阿董嘅性格，噚日咁嘅表現，可能已係尊嚴受損的極限。
電盈（008）今次批股，據聞反應好一般，搞到要以接近下限的4.40元定價，折讓幅度接近10%，加上外圍電訊股表現估計欠佳，中移動（941）、聯通（762）同數碼通（315）全面報跌，相信今日電盈復牌表現唔會好得去邊，如果能夠守得住4.40元配股價收市，已算好彩。電盈小股東噚晚可能會好似阿董咁失眠。
Cookie話，據聞有人要沽其他電訊股套現來撐電盈，如果係咁就真係勞苦功高咯。不過，唔知承接力有幾大？
創維數碼（751）主席日前才講過，賣電視機賺得重少過賣白菜，令人覺得生產電視機行業唔再值得投資。不過，此股噚日突然急升13.4%，成交達1.22億元，表現絕對唔係一箸菜咁。黑客話，有春江鴨炒佢業績好，另有傳聞話佢可能同某大國際企業合作。
阿虎