港股噚日跌一跌，成班炒家即刻嚇到腳軟，好多股票原本炒得好好哋，都因為炒家心驚而沽貨，令跌勢加速，好似文化傳信（343）、華豐環保紡織（364）及剛開車冇耐嘅金威（910）等，原本個個都話未炒完，點知全部都跌到走晒樣。
經紀黃前日話龍記（255）批股後不宜睇淡。龍記噚日微跌0.78%，收3.175元，企硬喺批股價3元樓上，已經好有交代。至於建發國際（223）就話口未完喺前晚搞掂批股，但只係批畀一個芬佬咁大把。
由於芬佬水浸情況仍然存在，未來港股炒風仍可維持一段日子。以創維數碼（751）為例，前日有間歐資行幫佢搞咗個推介會，原來創維下周二公布嘅全年業績，可能正到你唔信，分分鐘較全人類預期嘅1.5-1.8億元為高。
加上創維每股現金資產，原來有成人民幣1元咁多，所以創維股價噚日突然發難，勁升13.42%，收0.93元，成交金額更高達1.22億元，事件證明芬佬仍然大把錢炒股。
慕容小初