陳慧琳(Kelly)昨日到尖沙嘴出席「為夢想找一個承諾」開幕禮,對於有唱片高層被捕,她說:「𠵱家呢個時候,任何人發表言論都唔係咁好,咁樣對當事人同公司都唔公平,希望ICAC快啲查清楚就最好。」
問Kelly有否聽聞有人買獎?她說:「我未聽過,唔係講笑,真係冇聽過。」她坦言前日聽聞此事時感驚慌,她說:「俾兩個人『的』住返廉署,希望佢哋冇事,被邀請協助調查嘅人全部都識,何麗全同陳家倫都熟,因為好多大show都有合作。」
問Kelly曾否被邀參與高層的飯局?她連忙說:「冇呀。」對於歌手也被邀往廉署協助調查?她說:「覺得好恐怖同好心寒,真係冇做會好無辜。」
此外,正東昨日原為旗下三位新女歌手舉行記者會,前晚臨時取消,正東發言人表示因發生《勁歌》涉賄賂事件,惟恐傳媒不夠人手採訪,故此決定延後舉行。