關心妍小時候十分為食，導致身形肥嘟嘟，故被同學起了花名叫「肥婆關」，不過這個肥妹仔與兄長在加國留學時，練得一身防衞好本領，為防賊人入屋爆竊，兩兄妹竟用刀叉製成防盜鐘，認真犀利！
關心妍以前是肥妹仔，一天到晚只顧着吃，她不會用零用錢來買新衣和文具，反而全奉獻在零食上，加上她長得胖嘟嘟的，故此同學仔為她起了個花名叫「肥婆關」。
關心妍的童年雖然不愁穿不愁吃，但仍然有不快樂的時候。關心妍日前表示八歲那年，父母離了婚，母親把她跟哥哥送到溫哥華留學，一讀就是十三年，這些日子中，關心妍跟比她大年半的兄長相依為命。
關心妍日前說：「嗰陣時媽咪同我哋一齊過嚟溫哥華，佢坐咗幾年移民監，之後就返香港繼續做佢嘅美容生意，留低我同哥哥喺嗰邊讀書，媽咪又買咗間屋畀我哋住。我好細個就自己搭巴士，去唐人街買餸煮飯，星期六、日唔使返學，哥哥就負責剪草、吸塵，我就洗廁所同廚房，我同哥哥相處嘅時間最多，所以感情好好。」
關心妍從小就很獨立，但她與兄長在加國居住時，因年紀太小，每每擔驚受怕。關心妍記得有次其鄰居被賊人入屋爆竊，兩兄妹為此日夜提心吊膽，為防止賊人入屋，他們竟想出一條絕橋，就是自製防盜鐘。
關心妍說：「我同哥哥每晚都好驚，於是就用繩掛住啲刀叉，再將條繩掛喺門度，若果夜晚有人入屋，就會聽到聲，嗰時我哋用咗成年呢個防盜鐘，好彩一路都平平安安，冇事發生。」
採訪：朱芷瑩
