向有「大笑姑婆」之稱的楊千嬅，早前接受訪問時，自言是個憂鬱兼情緒化的人，不過亦因為這種個性，才令她更能投入藝人工作。而坦言喜歡得到掌聲鼓勵的千嬅，又矛盾地表示喜歡身邊的朋友不時鬧她，以責罵聲作為鞭策，她謂這樣才是真正的朋友。
楊千嬅早前接受now.com.hk《森美帶你遊花園》訪問時，透露自己是個憂鬱兼情緒化的人，又指若不是自己夠情緒化，根本不可能成為一個藝人。
千嬅說：「就係要利用情緒去唱歌同做戲，好似如果場戲講我俾男朋友掟（分手），就要利用情緒入戲，唔情緒化係做唔到artist（藝人），不過呢樣係需要時間去磨練；至於點控制情緒，基本上每年頒獎禮我上台都將情緒表現得唔適合，啲記者就以為我咁樣失控第日啲相會落大啲，但我唔係咁諗，不過我唔想解釋，解釋即係多餘。」
身為藝人自然渴望得到觀眾讚美的掌聲，不過千嬅卻表示掌聲固然重要，但朋友的責罵聲卻同樣不可少。
千嬅說：「掌聲係好緊要，但迫唔到，每一次上台嘅掌聲唔係必然，我鍾意掌聲嘅原因，係因為人哋認同我嘅想法，我嘅創作同演繹。
「不過我亦鍾意人哋鬧我，話我知有乜嘢唔啱，好似𠵱家有幾個同我做緊production（製作）嘅人都成日鬧我，唔單止鬧我唱歌，就連待人處事乜都鬧，咁先係真正朋友，我鍾意人鬧我多啲，因為人好易得戚，鬧多啲，對人都好啲。」
此外，千嬅又表示覺得要在娛樂圈生存，其實是要靠鬥智出位，而非鬥靚、鬥威及鬥出名。而千嬅目前最想得到的，是聰明、智慧及自由。
撰文：馮美茵
