前晚利物浦作客科隆踢友賽，基維爾自然成為球迷焦點，可惜冇乜料到，反而俾留咗一臉鬍鬚，但不脫貪玩本色嘅奧雲仔搶晒鏡。事實上利物浦今次贏波都係全靠奧雲仔，真係抵佢威嘅！
奧雲仔、基維爾等利物浦球員喺下半場開波前準備入替時，貪玩嘅奧雲仔就同基維爾呢個新丁開玩笑，嗱嗱聲揸住對方件波衫，重要着埋上身；不過基維爾亦都儍唔晒，知道件衫俾奧雲仔搶咗，就尷尷尬尬咁問佢攞番，睇到旁邊嘅梅菲都忍唔住笑咗出嚟！
唔知係咪俾奧雲仔咁樣玩一玩，基維爾喺比賽入面就冇乜料到，相反一臉鬍鬚「滄桑look」嘅奧雲就梅開二度，做咗上盤客財星！
我求大俠上季成日攞列當度嚟講笑，話佢踢親正選AC多數輸盤。講笑係咁講啫，查實呢個球員好值得尊重，據聞佢響呢個夏天冇咩放過假，狂操體能。呢位三十四歲嘅好波之人之前因傷長唞，都肯自願停薪，𠵱家又一心重振雄風，都算唔話得囉。
基維爾喺利物浦第一場比賽冇表現，不過前晚又係為熱刺處子上陣踢友賽嘅普斯迪加，就令人滿意嘞。前晚熱刺就作客對非聯賽球隊斯蒂夫尼奇，雖然對手實力弱啲，但係普斯迪加呢位葡萄牙新星，喺下半場入替之後一掂波就射入，表現對辦，𠱁到熱刺班球迷鬼咁開心！
原來皇馬前任教練迪保斯基，一直想交八號球衣畀中場馬基列尼，不過後者唔要，據講因為佢同麥馬拿文（皇馬八號球衣擁有人）老友，唔想奪人所好，以及自嘲冇料着一至十一號波衫喎！重有一樣，就係呢個法國中場原來同過至少二十四個女人一齊，唔怪得唔捨得件二十四號波衫啦！
前日阿根廷主場友賽烏拉圭，雖然主隊只係以二、三線國腳上陣，但就有啱啱轉會皇馬，未來有望被委以重任嘅後衞米列圖在陣。好衰唔衰米列圖喺三十六分鐘竟然「擺老烏」，令球隊只能打和二比二。而幫阿根廷入波嘅又係叫米列圖，不過呢個係前鋒D米列圖，咪搞錯呀！