英國萬人迷碧咸（DavidBeckham），上年以四億日圓（約二千六百萬港元），孖住老婆Victoria齊齊擔任日本美容院TBC嘅代言人。最近TBC重以Victoria嘅名義，出咗一隻名叫「Victoria'sStyle」嘅面霜。呢個最新廣告，啱啱就喺日前曝光。
Victoria推銷嘅呢隻面霜，雖然細細樽，但係就賣成千三蚊港紙，不過日本女仔一樣咁捧場。身為代言人嘅Victoria，重話自己喺呢隻面霜嘅生產過程中畀咗好多意見，鬼咁hardsell咁讚呢隻面霜能夠化腐朽為神奇，可惜Victoria俾人踢爆咗原來佢根本唔敢用呢隻產品呢！
據英國嘅雜誌報道，Victoria一直係另一隻貴價護膚品品牌LaMer嘅捧場客，根本不屑用呢隻據稱有神奇力量嘅「Victoria'sStyle」面霜。難為Victoria早前為咗宣傳呢隻面霜，重多收咗TBC一筆額外嘅酬金，名副其實嘅講一套做一套！
雖然碧咸兩公婆搵埋唔少錢，但碧咸都幾慘㗎，近日俾人發現日日只係食一隻小學生至愛嘅即食麵，而報道就指碧咸近排兩日唔埋就會去超市掃幾十包價值四十九便士（約六港元）嘅SuperNoodles即食麵，唔通係因為佢老婆Victoria掛住玩唔煮飯，搞到碧咸日日捱即食麵？