今個星期絕對係手提機天下，要喺太陽下先玩得嘅GBA《我們的太陽》，三十幾度下玩都咪話唔金，今次同個遊戲一齊推出嘅限定版紅/黑色主機，雖然冇行貨返，但係水貨相信呢份稿出街時亦已啱啱抵港，街價應該要大約千一到千二左右。WSC《機械人大戰Compact3》同埋GBA《機械人大戰D》，又係打劫Fans之作，唔該乖乖奉獻朝聖。月尾重有WSC《星鬥士星矢》同25號GBA《鬼武者Tactics》，真係唔愁冇Game玩。
參考價格：
《我們的太陽》$320-$350
《機械人大戰Compact3》$310-$330
有番十年機齡嘅機迷相信都有玩過射擊名作《R-type》，街機一出，啲人圍住嚟睇，睇到嘩嘩聲，畫面之靚當時可謂空前。後來分開兩集移植到PC-ENGINE，賣到四、五百一個都賣到斷貨，可想而知幾厲害，相比𠵱家機迷就幸福得多，行貨《R-TYPEFINAL》都係賣$288，據廠方表示今集會係系列最終章，有興趣不妨試吓。另早前斷咗貨好耐嘅《東京巴士案內》會喺8月7號推出廉價版，定價2,000日圓，即係180蚊左右有交易，同日推出萬眾期待嘅《WINNINGELEVEN7》，隨行貨會附送特別鎖匙扣。